Big Money. Big Music. Big Time. Frode Grytten Beat Band slår på stortromma under årets symposium.
Etter å ha valsa over Haugesund, Drammen, Bergen og Arendal kjem bandet heim til Odda for å servere publikum eit eksklusivt utval av dei største og beste songane som er lagd. Denne gongen er bandet forsterka med Tyssedalskoret, som vil spikre opp ein vegg av vibrerande og sjelfull korsong bak vokalistane Pedro Carmona-Alvarez og Annlaug Børsheim.

Det vil bli songar om pengar, songar om krig og kjærleik, songar om gud og heimstad, songar om å gå under og songar om å rope til dei som sit på toppen. 2017 er eit urolig og merkelig hav vi siglar rundt på: Gud er på forretningsreise, og skipet er i ferd med å synke. Men Frode Grytten Beat Band held seg flytande. I alle fall til siste tone er sunge denne kvelden i Lindehuset. 

Gjør deg klar for kjærleik, gjør deg klar for den store songen.