Odd Nordstoga (fødd 1972) er musikar, artist og forfattar, kjend for songar som «Bestevenn», «Kveldssong for deg og meg» og «Ein farfar i livet».

Nordstoga vaks opp på garden Plassen i Vinje som yngst av fire søsken. I ungdommen var han aktiv del av det vitale folkemusikkmiljøet i Telemark. Han slo igjennom med soloalbumet Luring i 2004. I løpet av ein karriere på over 20 år har han gitt ut 18 plater, vunne fleire spellemannsprisar, og samarbeidd med artistar som Ingebjørg Bratland og Sissel Kyrkjebø. Som artist har Odd Nordstoga funne sin plass i krysset mellom populærmusikken og den norske tradisjonsmusikken.

Denne hausten kjem boka Spelemann der han fortel si eiga historie; ei personleg forteljing om å vekse opp på gard, om å vere betre til å spele trekkspel enn fotball, om familielivet og songskapinga heime på Nordstrand og om det såre og det fine med å ha ei syster som er annleis.