Olaug Nilssen (f. 1977) kjem frå Solheimsdalen i Førde, men bur no i Bergen. Ei tid var ho busett i Odda, og er no ein del av det utvida Oddaforfattar-begrepet. Ho er forfattar, dramatikar og skribent, og har markert seg som ei uvanleg og viktig stemme i norsk litteratur.

Ho debuterte med romanen Innestengt i udyr i 1998. Sidan den gong har ho m.a. vore redaktør i Kraftsentrum (i lag med Gunhild Øyehaug), leiar på Skrivekunstakademiet i Bergen 2008-2010, Festspeldiktar under Dei Nynorske Festspela 2006 og gjeve ut bøker i ulike sjangrar. Særleg kjend er romanen Få meg på, for faen som både har blitt film og teater. I 2012 kom Kjøkenbenkrealisme - Ærlege historier om tidsklemma, i  2009 vart ho Nesten frelst av Sigvart Dagsland (biografi). 

Nilssen har skrive mykje for teater, m.a. forestillinga Stort og stygt, Nilssens bestillingsverk til Det Norske Teatrets hundreårsjubileum, som hausta strålande kritikkar i pressa. Det Norske Teater har og sett opp Få meg på for faen og Vi har så korte armar. Teaterstykket Skyfri himmel oppnådde stor suksess ved Rogaland Teater i 2006 (tekst Olaug Nilssen/sanger Bjørn Eidsvåg).

Ho har gjeve ut romanen Tung tids tale, ei sterk historie om å vere foreldre til eit autistisk barn. Om kampen for at barnet skal bli sett som den han er, og få den støtta han og familien treng. Ein liten gut mistar språket og forandrar personlegdom. For mora byrjar ein kamp, først for å forstå kva som skjer med guten, og så for å få hjelp til å gi han den omsorga og oppfølginga han treng. Familien er plutseleg i ein svært utfordrande livssituasjon, og dei må igjennom lange og utmattande prosessar for å få hjelp. Mødrer skal aldri gi opp, blir det sagt, men kva er aksept, og kva er å gi opp?


I romanen "Tung tids tale", som ho fekk Brageprisen for, fortel ho med ei uvanleg openheit om det å vere mor til eit sterkt funksjonshemma barn. I 2019 gav ho ut det satiriske lesestykket "Ikkje tenk på det", om stoda i norsk bokbransje, og same året fekk ho Doblougprisen for forfattarskapen sin. I 2021 fekk ho Fritt Ords pris i lag med Bjørn Hatterud og Jan Grue.