Kathrine Nedrejord (fødd 1987) er ein norsk-samisk forfattar, dramatikar og scenekunstnar som skriv bøker for både ungdom og vaksne. Sidan 2011 har ho vore busett i Paris. Nedrejord debuterte som forfattar i 2010 med romanen Transitt, og ho har motteke fleire utmerkingar for bøkene sine. For romanen Forvandlinga (2018) vart ho tildelt Havmannprisen, og det same året vart ho nominert til Uprisen og valt ut som Noreg sin representant til Ibby Honourlist for ungdomsromanen Slepp meg (2018). Frå 2018 til 2020 var Kathrine Nedrejord husdramatikar ved Nationaltheatret. 

I 2023 vart Nedrejord nominert til Nordisk råds litteraturpris for romanen Forbryter og straff (2022). Juryen skreiv dette om grunngjevinga for nominasjonen: 

«Det er ikke ofte man kommer i berøring med en litteratur som så skarpt og utilslørt avviser tilgivelse og benådning som etisk og juridisk bestemmelse … Med imponerende litterær kontroll og med klokskap snarere enn skånsomhet, med vrede snarere enn selvransakende forbehold, skriver Nedrejord frem sitt anklageskrift … Forbryter og straff er en rik roman som klarer å være tidsmessig og aktuell samtidig som den vekker til live en forbindelse f.eks. med Nathaniel Hawthornes hjerteskjærende The Scarlet Letter.»

Denne hausten kjem boka Sameproblemet, ei undersøking av kva det vil seie å vere samisk, kvinne, mor, dotter og barnebarn, og eit oppgjer med den norske staten, kyrkja og skulen.