Brynjulf Jung Tjønn er forfattar, lyrikar, forlagsredaktør og journalist. Han fekk Brageprisen for beste barne- og ungdomsbok for "Så vakker du er" i 2013, og vann P2-lytternes litteraturpris 2021 med «Kvar dag skal vi vere så modige» 

Brynjulf Jung Tjønn er fødd i Sør-Korea. Han vart adoptert til Noreg i 1983 og voks opp i Feios i Sogn. Han har vore journalist og redaktør, og sidan 2017 har han vore forlagsredaktør i Det Norske Samlaget.

Tjønn har publisert dikt, noveller og essay i antologiar og magasin, mellom anna i Syn og Segn. I tillegg har han gitt ut fleire bøker, både for born, ungdom og vaksne. 

Døden er eit grunnleggjande tema i forfattarskapen. Familiekriser er òg eit motiv forfattaren nyttar ofte. Tjønn skriv poetisk og innsiktsfullt, med nyskapande bilete og ein nøktern stil. Språket er enkelt og direkte, sterkt og vakkert.

Han romandebuterte i 2002 med Eg kom for å elske. Med korte, presise situasjonsskildringar skaper forfattaren bilete av ei ungjente fylt av smerte over ein familie i endring. Ungdomsromanen Så vakker du er (2013) tematiserer kjærleik, tap, sorg og død. Hovudpersonen opplever at ein kjær onkel er døyande. I sterke, rørande skildringar stig ein bodskap fram, om å gripe sjansar og leve livet medan ein har det. 

I haust gjev han ut langdiktet Kvit, norsk mann.