Babyar kjem definitivt ikkje med storken

Randi Fuglehaug skriv i boka Alt vel med mor og barn om 46 kvinner sine fødehistorier. Kvinner frå Sørlandet til Svalbard fortel om å føde på vegen, i lufta og til sjøs, om å plukke ti liter molter mens riene herjar, klatre over ras på veg til sjukehus og presse ut ein unge utan å vite at ein var gravid. Dei deler historier om å setje barn til verda midt i ein krig, føde utan straum under ein orkan, kjempe mot smertene mange tusen kilometer frå den ein er mest glad i og måtte sende nyfødde babyar bort i staden for å ha dei på brystet. Dei fortel om å bli mor for tidleg, for seint og når ein eigentleg trudde det ikkje lenger var mogleg.

Historiene handlar om Noreg dei siste 70 åra, om korleis det er å leve i vår privilegerte, langstrekte og vêrharde land i nord. Men mest av alt handlar dei om kvinnenes råskap.