Poesiprogrammet på Sentralbadet Litteraturhus har blitt ein fast og kjærkommen post på programmet, og i år har vi gleda av å presentere tre høgt skatta poetar frå Bergen.

Pedro Carmona-Alvarez er for dei fleste kjent som romanforfattar og musikar. Med årets bok, Sanger for kor, vender han tilbake til poesien og sangen, etter ti år i romanskrivingas teneste. Han har for lengst nådd elitenivået i norsk litteratur, og for publikum i Odda er han nærmast som ein kjær slektning å rekne, etter fleire år som fast gjest på Litteratursymposiet.

Programvert: Olaug Nilssen

Norsk litteraturs home coming queen, Cecilie Løveid, flytta etter fleire år i København tilbake til Bergen og skreiv den kritikarroste samlinga Flytterester i 2012, som befesta posisjonen hennar som ein av Norges fremste lyrikarar - i tillegg til å vere ein av våre fremste romanforfattarar og dramatikarar. Tidligare i år kom Dikt i samling -  og til Odda kjem ho– i høve årets unorske tema – med eit knippe nyskrivne Kina-dikt.

Også Henning H. Bergsvåg kjem til Odda med ein unorsk tittel.  Den engelske hagen,  hans femte diktsamling, hausta stor begeistring hos kritikarane tidligare i år.  Bergsvåg er,  i tillegg til å vere i tetsjikte av yngre norske poetar, ein engasjert  formidlar av poesi i Norge, mellom anna gjennom hans uhyre populære poesikveldar, Poesidigg, på Cafe Opera i Bergen.