Leif Einar Lothe (fødd 1969, frå Rogdo i Sørfjorden), kjend som Lothepus, er ein norsk entreprenør, spelemann, campingsplass-konge og TV-personlegheit frå Ullensvang.

Lothe har sidan TV-debuten med Fjorden Cowboys i 2014 delteke i ei rekkje TV-program, som Farmen kjendis (som han vann i 2017), 4-stjerners middag, Camp Kulinaris, Sofa, og sidan 2022; sin eigen dokuserie, Lothepus Camping.

Lothepus slapp si første plate, «Sallaren», i 2009, med rallarviser og sjølvslaga musikk, og i 2014 gav han ut plata «Cowboyhjarta». Etter dette har det følgt fleire singlar.  

Dokuserien Fjorden Cowboys fekk i alt 7 sesongar, i tillegg til spinoff-miniserien Eksepdisjon Lothepus. Lothepus Camping har så langt fått 3 sesongar og meir er på veg.

I 2017 kom biografien Går det til helvete, så går det til helvete ført i pennen av Finn Tokvam.

Det same året kåra nettmagasinet Kampanje Lothe til årets medienamn og årets kjendis, og han var den personen som hadde blitt søkt opp flest gangar på Google dette året.

Sommaren 2025 opna Lothe sin splitter nye campingsplass på Hjøllo i Odda der han mellom anna har fått reist både stavkyrkje og langhus. For dette prosjektet mottok Lothe Sivilisasjonsprisen 2024 for sitt bidrag til å fremme filosofi og klassiske verdiar som skjønnheit, poetikk og harmoni. Lothepus Camping vart umiddelbart ein svært populær turistattraksjon og destinasjon. Frå før driv han saman med sambuar Randi campingplass på kaia i Odda.

Lothe er også primus motor for musikkfestivalen Sus & Dus som dei siste tre åra har blitt arrangert på den gamle smelteverkstomta i Odda sentrum, og som trekk tusenvis av lokale og tilreisande publikummarar.

Til hausten kjem dessutan ei heilt ny bok; Lothepus-manualen. Boka er ei handbok der Lothe har plukka ut ferdigheiter det er lurt å ha i verktøykassa – og ein del praktiske triks som berre er jækla kule å kunne. Boka er ført i pennen av Heidi Molstad Andresen og kjem i oktober.