Alexander Løken er barne- og ungdomsbokforfattar (fødd 1982) frå Asker. Han er utdanna art director frå Westerdals, og har jobba som teikneserieskapar, skribent og frilansillustratør.

Løken debuterte i 2014 med barneboka Trollskallen, den første boka i ein fantasy-trilogi med handling frå Østerdalen i 1887. Boka er inspirert av skapningar og historier frå nordisk mytologi. Med humor og høgt tempo tek den 15 år gamle hovudpersonen, barneheimsguten og løpegutt Edvard Frost, lesaren med inn i skogane og ut på havet, i møte med troll og hulder.

Trollskallen vart teke imot med både kritikarros og prisnominasjonar. Den vart nominert til Ark sin barnebokpris, Kulturdepartementet sin Debutantpris og Bokslukerprisen til Foreningen !les. Ormeegget (2015) og Ulvehammeren (2016) er dei to siste bøkene i trilogien.

I 2017 kom ungdomsromanen De døde ser deg, og i 2018 Heksenatten, hans mest grøssande roman hittil. I Victoria Vargmo og jerntrollet (2019) tek Alexander Løken oss tilbake til Edvard Frosts univers. I 2022 kom Blüchers hemmelighet, der uhyggelege hendingar i notid vert knytt opp mot hendingar frå andre verdskrig.

Fleire av Løken sine bøker er inspirert av klassiske forteljingar, folkeeventyr og overnaturlege fenomen. 

I 2021 vart Løken valt til leiar av NBU (Norske barne- og ungdomsbokforfattere).