Pedro Carmona-Alvarez er forfattar, poet og musikar. Han vart fødd i Chile i 1972, men familien flykta til Argentina då han var 10 år pga. farens politiske verksemd i heimlandet. Seinare kom familien til Noreg og busette seg på Kolbotn. Pedro har vore Oddaven og fast symposiegjest sidan 2007. 

Han debuterte som 21-åring i Signaler, Cappelens årlege debutantanologi. Han er utdanna ved Skrivekunstakademiet i Bergen, og gav i 1997 ut den kritikarroste diktsamlinga Helter. Han har seinare gitt ut ei rekke diktsamlingar, romanar og essay. Pedro fekk Sultprisen i 2005 og Den norske Lyrikklubbens pris 2005. Han jobbar óg med gjendiktningar, særleg frå spansk,  og er lærar ved Skrivekunstakademiet. 

I 2009 kom Carmona-Alvarez' store roman og litterære gjennombrot, Rust. I 2010 kom eit massivt verk med til no upublisert internasjonal poesi på norsk: Verden finnes ikke på kartet. Antologien er redigert av Pedro Carmona Alvarez og Gunnar Wærness. Hausten 2015 gav han ut diktsamlinga Samtaler med onkel Nica og tante Viola.

I 2012 kom roman Og været skiftet og det ble sommer og så videre, som han vann P2-lytternes romanpris for og som fekk særs gode meldingar. I 2016 kom den bebuda oppfølgjaren, som fekk tittelen Bergen Ungdomsteater. Vi skal til Bergen på 1980- og -90-tallet og møter tre hovudpersonar: Marita, Johannes og Andreas, deira oppvekst og intime samkvem, erfaringar med sex, kjærleik, rus, fest, kunst, musikk og teater.

Hans samla dikt i perioden 1997-2017, Buktalerens rike, kom ut i 2017, og i 2019 gav han ut Refrenger. Tekster om stemmer og avtrykk, ei essaysamling som kretser om songar og stemmer, lytting og litteratur, identitet og biografi. I 2020 følgde fleire dikt i utgivinga Inventarium. I 2022 kom romanen La det bare bli blåmerker igjen, og i 2023 romanen Chiquitita.

Pedro Carmona-Alvarez er òg musikar i fleire band, mellom anna Sister Sonny og Moon Pedro & the New Farm Street Orchestra. Han er også musikalsk svirebror for Frode Grytten sine ulike musikkprosjekt.