ERIKA FATLAND

Erika Fatland (fødd 1983) er forfattar og sosialantropolog frå Ølen i Vindafjord kommune, busett i Oslo.

I 2015 var Erika Fatland einaste sakprosaforfattar blant dei ti forfattarar på Morgenbladet og Norsk Litteraturfestival si liste over dei beste forfattarane under 35 år. Ho er kjend som ein solid kunnskapsformidlar.

Erika Fatland debuterte i 2009 med barneboka Foreldrekrigen, ein roman om 10 år gamle Amanda, som opplever at foreldra ikkje berre skal skiljast, men at dei og innleiar full krig.

 Fatland har utdanning frå Lyon, Helsinki, Københavns Universitet og Universitetet i Oslo, der ho tok mastergrad i sosialantropologi i 2008. Masteroppgåva, med tittel ”Skole nr. 1. Tre år etter tragedien”, er basert på eit lengre opphald i Beslan i Nord-Kaukasus hausten 2007, der Fatland intervjua overlevande, etterlatte, pårørande, lærarar og representantar frå øvrigheita om etterverknadene av terroraksjonen mot Skole nr. 1, 1.-3. september 2004. Korleis er det mogleg å leva vidare etter ein slik katastrofe? Feltarbeidet vart komplettert med eit seinare  opphald i Beslan seinvinteren 2010, der ho i tillegg intervjua menneskerettsaktivistar og etterforskarar, og det brennbare og unike materialet kunne omarbeidast til ei reportasjebok: Englebyen.

I Året uten sommer (2012) gjekk ho tett på overlevande, berørte og etterlatte etter 22. juli. Ho utvider òg perspektivet med å sjå hendinga i samanheng med liknande tragediar internasjonalt. Boka tek oss med til Oklahoma og San Francisco i USA, Beslan i Kaukasus, Winnenden i Sør-Tyskland og Valletta på Malta.

Boka Sovjetistan (2014) gjekk i vår til topps i «Heile Hardanger og Voss les», biblioteka si kåring av fjorårets favorittbok. Dette er ei lettlesen og fengslande bok om desse landa med dei vanskelege namna, som det verken er lett å reise til eller i. Den som vågar seg på å reisa hit må vera budd på så mangt. På reisene i dei tidlegare sovjetrepublikkane må ho i blant ha med oppassarar, og ho må ha med lokalkjende guidar. Gjennom samtalar med desse kontaktane, andre ho møter, og ved observasjonar av naturen og arkitekturen, gjev ho oss eit interessant bilete av livet i denne delen av verda. Ho trekkjer også opp dei historiske linene og gjev oss bakgrunn og kunnskap for å forstå notida.

Fatland arbeidar òg som frilansjournalist for fleire norske publikasjonar, som Dag og Tid, A-magasinet, Syn og Segn m.fl.
 
 
 

Tidligere program

ERIKA FATLAND

Katalog 2018

 

Katalog 2018