Johan Harstad er ein norsk forfattar frå Stavanger (fødd 1979). Han har allereie ein betydeleg produksjon bak seg, bøkene hans er omsett til fleire språk, og han har vunne mange prisar.  

Harstad debuterte i 2001 med kortprosasamlinga Herfra blir du bare eldre. I novellesamlinga Ambulanse (2002) skriv han om personar som lever i grenselandet mellom normalitet og galskap, liv og død, suksess og fiasko.

Harstad debuterte som romanforfattar med den kritikerroste Buzz Aldrin, hvor ble det av deg i alt mylderet? (2005). Buzz Aldrin.. vart seinare filmatisert og vist på NRK, og er gitt ut i Sverige, Danmark, Finland, Nederland, Tyskland, Færøyene, Italia, Russland, Frankrike og USA.

Hässelby (2007) er ein humoristisk og kompleks roman prega av undergangsstemning. Hovudpersonen er barnebokfiguren Albert Åberg, som no har blitt vaksen.

Darlah – 172 timer på månen (2008) er ein grøssar for ungdom i alle aldrar. Boka, som handlar om tre ungdomar si ferd saman med romfararar til månen, fekk strålende kritikk og Brageprisen i kategorien Barne- og ungdomsbøker. I 2014 vart den kåra til tidenes beste ungdomsbok (Upris/Dagbladet).

Harstad har óg skrive fleire teaterstykke, og i 2008/2009 var han engasjert som husdramatikar ved Nationaltheateret. B-sider (2008) er ei samling med dramatikk og prosa. For skodespelet Osv. (2010) fekk han Ibsenprisen i 2014.

Flammesingelen Manifest for folk flest var utgangspunkt for Motorpsycho sitt tingingsverk for Olavsfestdagene i 2014: En konsert for folk flest, framførd i Nidarosdomen.

I haust kjem etter planen ein ny roman frå Harstad: Max, Mischa & Tetoffensiven, ein omfattande roman om å sakne Noreg og eit spørsmål om kor lenge ein kan vere vekke før det er for seint å dra heim.