Begjær! Herleg, herleg, men farleg, farleg. Og med politisk sprengkraft?  

Vi har invitert tre forfattarar som alle utforskar begjæret i bøkene sine. Her vert krafta til begjæret mellom menneske utforska, men også korleis begjær er i stand til å sette samfunnsordninga i rørsle. 

Dansk-norske Maren Uthaug skildrar ei verd der kvinnene har fått makta, og det kvinnelege begjæret står i ei særstilling i samfunnet. Gode orgasmar har vorte pensum, og mennene blir haldne i interneringsleirar der dei hovudsakleg er til for å tilfredsstille kvinner sitt behov og drive forplantninga vidare. Hedda Robertsen er kanskje den norske forfattaren som mest iherdig har gjeve seg i kast med å skildre kvinneleg begjær. Det handlar om uskyld og erotikk, misunning og omsorg, opprør, frigjering og lengsel. Forfattar og poet Jonathan August Lengali har plassert begjæret i ein rural kontekst, omgitt av blomar og vekster og seterdrift - og leikar i fleire av bøkene sine med begjæret si vitale kraft. 

Velkommen til ein samtale som pirkar i etablerte forestillingar om lyst og om å vere leiken i møte med språk, poesi og sex. Om vitalitet, sårbarheit og om å ta plass. Programvertar er Tora Sanden Døskeland og Henning H. Bergsvåg.