Eit møte mellom to forfattarar med ein gjensidig fascinasjon for kvarandre sine bøker, og som deler eit stort engasjement for fjellet og naturen. Sigri Sandberg og Guri Sørumgård Botheim har i fleire år vore brevvenner. No møtest dei på scena!
Sigri har gjeve ut ei rekke bøker om natur og friluftsliv. Seinaste utgjeving er Det året eg vakna: kva skjer med naturen – og oss? Her innser ho at ho har vore for feig. Ho har fortrengt at skogane brenn, at havet stig, at vi står til hoftene i ei natur- og klimakrise. I boka erklærer ho seg difor skuldig i feigskap. Ho skriv seg inn i frykta, og inn i fakta – og i krisene vi står i. For kva er det eigentleg som skjer, og kva gjer det med oss?
Guri Sørumgård Botheim skriv i romanen Høgfjellsmeldinga om Ragna Svae som får jobben som kommunikasjonsansvarleg ved Norsk villreinsenter på Hjerkinn. Der får Ragna i oppgåve å skrive ein NOU-rapport om villreinen og om fjellet si etiske stemme. Kollegaene meiner rapporten er nok eit papir for skrivebordsskuffa, men Ragna ser for seg eit modig dokument med politisk sprengkraft. Kven er fjellet sine heltar og skurkar? spør ho og lanserer eit upopulært svar. Arbeidet hennar utløyser sterke reaksjonar.
