Marit Eikemo er fødd 1971 i Odda, og busett i Bergen. Ho er forfattar, har jobba som journalist, redaktør og kulturarbeidar. I perioden 2009-2014 var Marit festivalleiar for Litteratursymposiet Odda. 

Eikemo debuterte skjønnlitterært med romanen Mellom oss sagt i 2006, og i 2008 kom den moderne klassikaren, essaysamlinga Samtidsruinar, som vart kåra til årets nynorskbok. I 2009 kom hennar andre roman, Arbeid pågår og i 2011 romanen Samtale ventar. For sistnemnde bok fekk ho Nynorsk litteraturpris i 2011.

I 2015 gav ho ut romanen Alt inkludert, som m.a. vart nominert til P2- lytternes romanpris, og våren 2018 gav ho ut romanen Gratis og uforpliktande verdivurdering. Novellesamlinga Hardanger vart lansert på Litteratursymposiet i 2019, og i 2021 var det sleppfest for romanen Team Tuva. 

Eikemo sitt blikk på samtida er skarpt og relevant, utan å vere moraliserande. Bøkene hennar er både smarte og underhaldande, og har imponert både kritikarar og publikum med sine presise observasjonar av det norske samfunnet og tida vi lever i. Ho fekk Amalie Skram-prisen 2017 for sin forfattarskap, og var festspeldiktar på Dei nynorske festspela 2018.

Ho er dronninga av talkshowet Hallo Odda, og kjem i vår med ny roman: Vi er brødrene Eikemo, familiehistorie frå huset i Berjaflotvegen.